ليه بنحط بيض النعام في الكنيسة؟
بيقول أبونا أرميا بولس:
ناس كتير بتسأل: ليه بنشوف بيض النعام في الكنيسة؟ ويقولوا زمان إن النعامة تفضل باصة على البيضة لحد ما تفقس، وده رمز إن ربنا باصص علينا لحد ما نعيش الحياة الأبدية.
لكن الكلام ده مش مظبوط.
لو رجعنا للكتاب المقدس، لسفر أيوب، إصحاح 39 من آية 13 لـ 17، هنفهم الحقيقة. ربنا نفسه بيتكلم عن النعامة.
بيقول إن جناح النعامة يرف، بس هل بترف بجناحاتها بحنان ومسؤولية؟ ولا مجرد ريش من غير إحساس؟
الحقيقة إن النعامة ما بترعيش ولادها. بتبيض البيضة، تدفنها في التراب وتمشي، وتنساها خالص. الحرارة تخلي البيضة تفقس، ويطلع الصغير، وهي لا تعرفه ولا تسأل عنه.
وده معناه إيه؟
معناه إن حتى لو أقرب الناس، الأب أو الأم، نسوا أولادهم أو قصّروا، ربنا عمره ما ينسى.
زي ما المزمور بيقول: «إذا تركني أبي وأمي فالرب يضمني».
علشان كده، لما نشوف بيض النعام قدامنا في الكنيسة، نفتكر المعنى ده:
مش اعتماد على البشر، ولا حتى على أقرب الناس، لكن اعتماد كامل على ربنا، اللي ما بينساش حد، ودايمًا يضم أولاده ليه.
*******************
اعداد / امجد فؤاد
موسوعة الديانة المسيحية
ليست هناك تعليقات:
إرسال تعليق