+ هل المسيحية بتسمح بشرب الخمر؟ وهل ينفع أشرب حاجة تفاريحي في رأس السنة؟

هل المسيحية بتسمح بشرب الخمر؟ وهل ينفع أشرب حاجة تفاريحي في رأس السنة؟

السؤال ده بيتكرر كتير مع قرب رأس السنة، وناس كتير بتتلخبط. خلونا نفهم الموضوع ببساطة من كلام البابا شنوده الثالث، اللي قال:

الكتاب المقدس ما حرّمش مادة الخمر نفسها، لكنه حرّم سوء استخدامها. يعني مفيش مادة في حد ذاتها حرام، لكن لو استخدمت استخدام غلط، هنا تبقى المشكلة.

الخمر كمادة مش حرام، بدليل إن الكنيسة بتستخدمها في الأسرار المقدسة. لو كانت الخمر ملعونة أو محرمة، ما كانش ينفع تدخل في عمل مقدس. الغلط الحقيقي هو السكر وفقدان العقل.

الخمر فيها كحول، ونسبة الكحول بتختلف. في أنواع نسبة الكحول فيها قليلة جدًا، زي اللي بتُستخدم في الكنيسة. وفي أنواع تانية نسبة الكحول فيها عالية جدًا، ممكن توصل لـ 50% أو 60%، ودي بتضر الإنسان صحيًا ونفسيًا، وبتخليه يفقد صورته كإنسان على صورة الله.

الكحول نفسه مش حرام، لأننا بنستخدمه في الأدوية، وكتير من العلاجات فيها كحول. لكن المشكلة دايمًا في الاستخدام السيئ.

مع كل ده، الكنيسة بتنصح بعدم شرب الخمر، مش لأنها محرمة، لكن لأن الإنسان ممكن يبدأ بحاجة بسيطة، وبعدين تتحول لعِشرة، وبعدين لإدمان، وفي الآخر تدمّر حياته. وناس كتير جدًا وقعت في المشكلة دي من بداية صغيرة.

زمان، قبل تطور الطب والصيدلة، كانوا بيستخدموا الخمر في العلاج. عشان كده بولس الرسول قال لتيموثاوس: خذ قليلًا من الخمر لأجل معدتك وأصقامك الكثيرة.

لكن ده كان لشخص مريض، وفي زمن مفيش فيه أدوية زي دلوقتي. يعني ما ينفعش نستخدم الآية دي دلوقتي ونطبقها على نفسنا، لأن الصيدلة اتطورت، وفيه آلاف الأدوية الآمنة.

وكمان في قصة السامري الصالح، لما لقى الراجل المجروح، صب على جراحه خمر وزيت. الخمر كان للتطهير بالكحول، والزيت للعزل والشفاء. وده كان علاج وقتها، مش معنى كده إن الواحد دلوقتي يتجرح في البيت ويقول أجيب إزازة خمر أداوي بيها نفسي.

الخلاصة إن الخمر مش محرمة، لكن السكر هو المرفوض. وأفضل طريق هو إنك تبعد عن الخطوة الأولى، لأن الخطوة الأولى ممكن تبان بسيطة، لكنها تفتح باب صعب يتقفل بعد كده.

وكمان في بلاد شديدة البرودة، كانوا بيستخدموا الخمر للتدفئة بسبب الصقيع الشديد، لكن ده ما ينطبقش علينا وإحنا في بلد حرارتها عالية. يعني ما نقارنش ظروفنا بظروف غيرنا، وكل واحد يعيش حسب واقعه.

الخلاصة النهائية إن المسيحية ما بتشجعش شرب الخمر، وبتدعو الإنسان إنه يحافظ على عقله وحياته، ويبعد عن أي حاجة ممكن تبدأ بسيطة وتنتهي بخسارة كبيرة.

************************

اعداد / امجد فؤاد

موسوعة الديانة المسيحية